政情：鄧亞萍：有心唔怕遲
已經退役十三年嘅「乒乓王后」鄧亞萍前日喺北京同超過三百個香港青年同三十位北京中學生對談交流，佢喺活動上一共回答咗十二條問題，包括運動生涯、退役後生活同運動外交等。鄧亞萍語重心長咁勉勵青年要及時規劃人生，訂立目標之後全力向理想出發。
鄧亞萍退役之後去咗北京清華大學讀書，之後繼續進修，最後喺英國名牌大學劍橋大學拎埋經濟學博士學位。佢同學生分享時提到，自己初初入學時連廿六個英文字母都識唔晒，年輕時掛住練波，放棄咗好多學習嘅時間。直到退休之後，因為唔想做個「無知識」嘅人，所以好努力讀書，最終有今日嘅學術成就。
鄧亞萍打波叻係人都知，原來佢初初入清華讀書時因為搵唔到方向，搞到成績好差，後來佢不斷努力，最終除咗完成學士課程之外，仲可以用英文寫完博士論文。佢喺活動上仲鼓勵青年人「有心唔怕遲」，最重要係及時規劃人生，之後全力向理想進發，同埋思考自己可以為國家民族同自己貢獻啲乜。