政情：粗口Rap寸爆特蠢部隊
香港旅行團浴血菲律賓，菲國特蠢部隊營救人質時嘅拙劣表現，遭全球圍攻，港人更加氣憤難平。五散人尋日上禮賓府同煲呔曾午宴，席間大家談論得最熱烈嘅，唔係施政報告或者政改本地立法，而係一首網上流傳Rap盡菲特蠢部隊醜態嘅港式粗口歌，煲呔曾仲即場用手機試聽，歌詞啜核，雖然粗口橫飛，但大家聽完都勁讚製作夠專業。官場同政界對菲國特蠢部隊嘅憤懣，不言而喻。
政改通過，煲呔曾輪流宴請政黨，尋日輪到五散人。除咗廠商會代表林大輝因離港缺席，「IT豪」譚偉豪、保險界陳健波、會計界陳茂波同「怪醫」梁家騮全部到齊，沉悶嘅官場飯局，臨場「加餸」有粗口歌送飯，因而變得不平凡。
點擊率達廿萬人次
專責管理特區政府悼念菲國人質慘劇官方facebook嘅特首辦特別助理陳岳鵬提起，facebook近兩日嘅市民留言轉趨激進，矛頭紛紛指向菲國警方營救人質嘅表現，令人關注，話題一開，在座人人熱論。其中特首辦主任譚志源（Raymond）話，網上流傳一首Rap歌，名叫「菲特種部隊」，點擊率仲累積到廿萬人次添。煲呔曾聽到，好奇咁話：「有咁嘅事？」於是攞出部手機，上網搵片，正想㩒掣播放，Raymond急急提醒，不如問問在場嘅唯一女士、特首私人秘書寗漢豪先啦，事關條片充斥粗口，ＸＹＺ橫飛㗎！寗漢豪擰擰頭示意唔介意，煲呔曾先敢將部手機放喺枱面，公諸同好。
呢條由署名市民「阿龜」製作嘅「菲特種部隊」，諷刺菲國特蠢部隊星期一晚救人嘅拙劣表現，以憤怒聲音為港人出氣，但成首歌粗口橫飛，我哋好辛苦先至搵到幾句可以見得報嘅，好似挖苦菲警「淆底」，遲遲唔敢衝入車廂救人嘅呢一句：「你淆，就唔好『係D』記者鏡頭前發姣！企『係到』成碌木咁，『比』我一早起錨！」又有諷刺軍警錯失射殺槍手良機，導致血腥告終：「你支sniper識唔識用？兇手打開個窗，你企喺度吹風，等到夜晚先攻入又唔成功。」
歌詞勁啜核，韻律輕快，據聞煲呔曾聽完，都讚製作認真、夠專業。在座其他人更加相視而笑，各人對菲警嘅表現有何睇法，盡在不言中！已為人母嘅寗漢豪，去年初任財經事務及庫務局副秘書長時，因無法忍受「長毛」梁國雄爆粗，喺議事堂上即場抗議而名噪官場，但尋日成首粗口歌由頭聽到落尾，如果唔係對人質慘劇仍然氣憤難平，又點頂得順？