中環出更：菲警救人拙劣 富豪眼火爆
菲國挾持人質流血事件牽動港人心，唔少富豪睇見菲警拙劣嘅救人手法，亦嬲到眼火爆。「金利來」太子爺曾智明（Ricky）炮轟菲國總統冇政治智慧；恒地副主席李家傑形容事件「好shocking（震撼）」；賭王何鴻燊千金何超蕸就話，爸爸全程
實電視，睇見有港人遇難，非常傷感。新地非執董郭炳湘亦不吐不快，批評精銳特種部隊當日竟然無出動，令人難以接受。
由中聯辦副主任李剛擔任主席嘅「華夏基金會」，尋晚喺四季酒店舉行慈善晚會，筵開廿六圍，城中大孖沙賞面到賀，席間話題離不開菲國警方斷送八條人命嘅慘劇。
李家傑願伸援手
Ricky話，事發當日身在廣州公幹，睇電視見到菲國警方慢吞吞救人，覺得真係離晒譜！佢批評菲國政府事後才補鑊，難辭其咎，認為菲國應盡快檢討特警裝備及談判技巧。李家傑都批評菲國政府處理挾持事件手法極拙劣，釀成不幸慘劇。佢對死者家屬及傷者表示關心，承諾若對方需要協助，如教育費用等問題，恒地樂意伸出援手。
郭炳湘話喺菲國冇投資，四、五年前去過一次，感覺「冇乜值得好睇」，去一次就夠。雖然挾持事件以流血收場，但港人表現團結，令佢好感動。「觀瀾湖」太子爺朱鼎健幾年前去菲國出席友人婚宴，幸好對方安排妥善接送，所以唔使擔心人身安全。
「華夏基金會」成立於八十年代，係一個協助內地發展教育同醫療衞生嘅慈善機構。基金會前主席係原港澳辦主任魯平，依家換上了李剛。咁有意義，城中富豪慷慨解囊。「牛仔褲大王」楊釗捐出一百萬港元，另加二十萬元予「華夏學子助學金」；身兼慈善晚會籌委會主席嘅鄭裕彤二仔鄭家成捐一百萬元；李家傑捐五十萬元；Ricky曾捐三十萬元；啱啱當選全國青聯副主席嘅陳仲尼、「深圳王」黃楚標及中華總商會會長蔡冠深都捐出二十萬元，難怪今年籌到八百萬港元。
卓妮