打從協進會成立當日，鬚鬍曾就話好想盡快訪問台灣，但幾個月嚟連一啲聲氣都冇，港府打鑼打鼓咁話要促進港台關係，但實際上係歎慢板，反而台灣方面積極啲，幾個市長已經先後訪港。
呢兩日終於有消息話鬍鬚曾訪台，台灣媒體尋日嘅報道不但有埋鬍鬚曾訪台嘅日子，仲列出具體行程，期間策進會董事長林振國會喺台北宴請佢，仲會同陸委會主委賴幸媛等人見面等。
然而鬍鬚曾尋日朝早喺政府總部回應記者有關提問時仲係滴水不漏，淨係重申希望出訪台灣，有消息時會公布。直至下晝五點，政府至公布鬍鬚曾會喺本月二十八日至三十一日訪台，至於同邊個會面，都仲係驚驚青青唔敢講。訪問台灣係好事，都唔知點解港府要搞到咁鬼祟！