政情：金勞詹帶隊非洲挖金
立法會議員「金勞詹」詹培忠出名百足咁多爪，繼今月初拉大隊同班潮州籍議員返鄉下玩咗幾日後，月中佢又帶隊去咗非洲，不過唔係過南非太陽城賭兩手，亦唔係去東非睇飛禽走獸，而係去非洲島國馬達加斯加睇礦產。
馬達加斯加係全球第四大島國，以礦產豐富聞名於世，其中石墨儲量居非洲首位，金勞詹以往有喺馬國投資，但唔算好多，今次做團長，帶一班本港專業人士過去視察，唔知係咪有搵銀大計進行中。馬達加斯加去年初因政局不穩，首都發生大騷亂，導致人命傷亡，金勞詹依家帶得隊去視察，相信局勢已經穩定落嚟，但金勞詹今次遠赴非洲，據聞，同樣遇上「驚險」事件。
話說有日當地機構安排一架直升機畀佢代步，但架機又細又簡陋，飛上天搖搖欲墜咁款，見慣大場面嘅金勞詹見到都不禁猶豫咗一陣，最後硬住頭皮上機，喺天空上面一路坐一路驚，到埗腳踏實地一刻，先至鬆一口氣。