政情：大輝寶島勁跳扭腰舞
「五散人」立法會議員林大輝牽頭嘅C18，呢幾日一直喺台灣考察，尋日去咗台北南部嘅文山區忠順里，體驗當地和睦嘅鄰里關係。可能受到當地人和諧氣氛嘅感染，大輝同一班居民又跳又唱，不過大輝可能太過投入，扭到勁得滯，場面十分搞笑。
大輝形容有四千人左右嘅忠順里，鄰里關係相當好，同經常大喊和諧口號嘅香港差天共地。為咗同居民打成一片，大輝仲同一班忠順里嘅居民一齊跳舞，大輝話班居民一邊跳舞，一邊唱歌，氣氛不知幾好，佢自己亦都滿面笑容，雙手交疊喺胸前，跟住成班居民齊齊扭腰跳舞，仲扭得幾誇張。
講番個考察，大輝話忠順里有唔少值得借鏡嘅地方，例如喺居民出入必經之路裝個顯示屏，將區內活動資訊同所有人分享，又或者畀居民參與鋪地磚，增加歸屬感等。唔知本身係沙田區議員嘅大輝，喺區會提出鋪地磚會唔會有人贊成呢？