政情：喬曉陽送驚喜賀田二少牛一
商界「五虎將」前晚喺君悅舉行完六十歲世紀生日派對，壽星公之一嘅G2000老闆兼港區全國人大代表田北辰尋日即趕赴北京，列席審議香港政改方案嘅全國人大常委會會議。田二少雖然錯過同家人去加拿大慶祝牛一，但就得到人稱「喬老爺」嘅全國人大常委會副秘書長喬曉陽送上驚喜。
中央官員近年行親民路線，喬老爺尋日做咗一個完美示範。全國人大常委會第十六次會議尋日開幕，喬老爺盡地主之誼，中午宴請全國人大常委范徐麗泰、基本法委員會副主任梁愛詩，以及田二少、王敏剛等六名上京列席會議嘅港區人大代表。當喬老爺同大家食到下半段，突然房門打開，一個插住一支火燄棒嘅生日蛋糕緩緩推入，席上人人一臉錯愕，然後係一陣笑聲，笑得最燦爛嗰個當然係田二少啦，因為喬老爺此時亦起身走向田二少，說：「祝生辰快樂！」冧到田二少差啲暈咗。
田二少事後同我哋講，喬老爺送咁大驚喜畀佢，真係令佢受寵若驚。