政情：商界雙雄撐同業發聲
樓價高居不下，物價不斷上升，升斗市民打生打死都未必能儲夠份首期「上車」，香港社會嘅深層次矛盾早已存在，而且令港人「仇富」情緒繼續升溫。猶記得幾日前，中聯辦副主任黎桂康先啱啱罕有地發表書面講話，敦促本港工商界團結起來，及早謀劃未來參政角色，迎接後政改新形勢。尋日總商會主席胡定旭（肥胡）同立法會總商會代表林健鋒（Jeffrey）即刻有反應，唱雙簧叫商界人士唔好再做被動嘅一群，要主動發表己見。
肥胡同Jeffrey尋日出席一個中小企高峰會時，把握機會「叫醒」一班向來被動嘅商人。Jeffrey率先發炮，炮轟近期港府嘅政策都不利營商，包括啱啱通過咗嘅最低工資立法以及嚟緊嘅公平競爭法，令工商界變成一大群落後晒嘅蝸牛，想行前都行唔到。佢呼籲商界人士團結一致，多啲發表自己意見，為社會做啲嘢。
黃友嘉大潑冷水
做咗總商會主席無耐嘅肥胡都話，商界人士習慣唔出聲，搞到社會變得兩極化。佢話其實社會上有一成係保皇黨，一成係反對派，剩低嘅八成好多都係商界或專業界人士，偏偏作為主流嘅佢哋卻係沉默嘅一群。究竟肥胡呢條數計得啱唔啱，我哋暫且不去深究，不過佢都係同Jeffrey同一陣線，話經濟同民生息息相關，呼籲商界及專業界人士要多啲發表意見咁話。
肥胡同Jeffrey二人唱雙簧，擺明就係呼應黎桂康日前嘅講話，不過要商界人士多啲發表意見或者還可以做到啲，但要佢哋多啲參政，呢個如意算盤就唔係咁易打得響。出席同一場合嘅中華廠商會會長黃友嘉尋日就直言，商界人士一向務實，鍾意埋頭苦幹，保持沉默係佢哋一貫嘅文化：「你話議員、社工呀嗰啲就唔同啫，佢哋嘅職責係要講嘢嘛！我哋都唔係。」佢直言個人暫時冇興趣組黨或參政，雖則係咁，佢都希望大家唔好一竹篙打一船人，當晒所有商界人士同政府推動經濟發展嘅政策都係衰嘢喎。