中環耳目：施榮懷向「海南少爺」偷師
香港人愛食雞，製法五花八門，新加坡正宗風味「海南雞飯」月前登陸香江，廠商會副會長施榮懷呢日相約腸胃及肝臟科專科醫生王振宇（Benjamin）同擔任東華三院副主席嘅細佬施榮恆，齊齊去銅鑼灣「海南少爺」試菜，邊食邊向老闆偷師。
招牌雞飯 皮脆肉滑
六月底開業嘅「海南少爺」，其中一個老闆鄭相賢（Tony）都有份開星級意菜「The Drawing Room」，眼見女友鍾意食海南雞飯，力邀新加坡文華酒店旗下食府「Chatterbox」大廚做過江龍。
三人一坐低，Tony已端上幾款招牌菜，包括特色沙律「新加坡蘿惹」、「肉骨茶煲」等，當然唔少得招牌海南少爺雞飯。施生趁機請教煮雞秘方，Tony破例「過招」，秘訣係煮雞前預備一鍋用多隻嫩雞匯聚成嘅精華，即係「雞膽」，大廚將新鮮雞放入「雞膽」內浸熟再過冷河，雞皮會變得香脆，肉質嫩滑。
煮雞飯更是多學問，Tony嚴選泰國香米，且新舊米並用，讓米粒吸收更多上湯精華。試菜期間，施生同王醫生互相夾餸，默契十足，原來施生係北京市政協常委，王醫生就係北京市政協委員，兩人經常北上開會，漸成老友。