中環出更：蔡太花豹鑽錶野性貴氣兼備
玩具大王蔡志明太太蔡李惠莉早前整親手指尾要戴護托，話咁快又活躍番，尋日下晝相約閨中密友逛ifc掃貨。蔡太穿上豹紋乾濕褸，戴上黑超，拎住新款Valentino手袋，打扮叫人眼前一亮。近排各大名店減緊價，但蔡太兜咗幾圈都係冇心水。
卓妮上前打招呼，蔡太話，旗下幼稚園臨近九月開學，家長爭崩頭報名，唔敢行開，所以暑假冇出門，要留喺香港。不過老公蔡生心思不絕，知道太太鍾情豹紋設計嘅衣服同首飾，早前就買咗一隻繪有花豹圖案嘅瑞士鑽石名錶SARCAR畀太太。
早前蔡太戴住佢出席保良局傳媒午宴，散發野性光芒。SARCAR以製作「會轉動的鑽石錶」聞名於世，蔡太手上嗰隻就有三粒會轉動嘅巨鑽，配埋栩栩如生嘅花豹圖案及豹紋錶帶，野性得嚟有貴氣，難怪蔡太戴住佢時甜絲絲話:「老公送嘅，價錢？唔知喎。」
卓妮