中環出更：袋巾傑慳家偕妻掃減價貨
掃減價貨，唔係女人專利。立法會議員梁家傑都係「精明男」，遇上專營寢室及浴室用品嘅「Bed & Bath」劈價促銷毛巾，掃番兩條。「袋巾傑」兩個星期前行過呢間舖頭時，已
到呢款毛巾，可惜當時冇特價，忍手唔買住。今次執到筍嘢，慳番三百六十元。
袋巾傑唔介意做「住家男」，屋企浴簾爛咗，都係由佢去買。早前一個星期五下晝五點半，袋巾傑同太太拍拖去中環太子大廈行街街，兩人喺COVA買完蛋糕繼續進發，不過佢哋唔多吼名牌時裝，反而鍾情行家品店，Bed & Bath部分毛巾做緊半價優惠，袋巾傑一眼到，拉太太入去執減價貨。
梁太掌管財務
話晒揀嘢係女人特長，袋巾傑索性翹住對手同店員八吓有乜新貨，梁太三扒兩撥掃咗兩條大毛巾，一條米色，另一條係淺黃色，計落比原價平咗一半，抵到爛，最後由梁太負責畀錢，袋巾傑就攞出自備環保袋，袋好兩條新毛巾，夠晒合拍。
之後兩口子再行去另一家品店「Indigo」睇嘢，原來梁太畀香噴噴嘅蠟燭吸引，袋巾梁似乎唔多鍾意聞蠟燭，只係喺太太旁邊手指指。梁太一口氣掃入兩包迷你香薰蠟燭，又係自己畀錢找數，睇嚟梁太都係屋企嘅財政大臣。
連環執到筍嘢，袋巾傑同太太顯得好滿足，行出門口撞到卓妮時，忍唔住分享掃貨成果。袋巾傑介紹手中嘅毛巾話：「呢個牌子OK架，又靚又軟熟，遇啱有特價，咪買定兩條擺喺屋企囉！」連揀毛巾都咁心思縝密，睇嚟「袋巾傑」唔止係「住家男」，仲係「情趣男」添噃！
卓妮