政情：長毛有契女幫出頭
社民連立法會議員梁國雄（長毛）辭職後又循補選入番立法會，佢嘅大埔辦事處尋日重新開張，唔少嘉賓出席捧場，好似立法會主席、公民黨主席關信基、立法會議員陳淑莊、社民連創黨主席黃毓民、時事評論員程翔同「大專2012」周澄等，不過最特別嘅，係佢嘅靚靚契女。
長毛六歲大嘅契女係一個眼仔大大、勁可愛嘅可人兒，形象硬朗嘅長毛喺活動上不時抱住契女玩，除咗笑容充滿溫柔之外，從佢嘅眼神中仲可以見到乜嘢叫「父愛洋溢」，同平時發火鬧人時完全唔一樣，實在難以置信。
長毛透露，契女係混血兒，一出世已經同佢上咗契，平時都有帶佢去唔同活動，好似七一遊行同社民連活動等。長毛仲透露，上星期三曾經帶契女入立法會，咁啱撞到立法會主席，契女即時問對方做乜成日趕契爺走。據講，主席笑笑口咁答：「因為你契爺唔守秩序囉！」