政情：李雲迪選美着重氣質

李雲迪話，今次係第一次擔任選美評判，但係都唔擔心，因為自己每日都沉醉於音樂美之中，所以對「美」都有番咁上下心得喎。佢話就好似音樂一樣，美係人體自然散發嘅氣質，而佢話因為自己最愛蕭邦嘅音樂，所以參賽者最好都係有浪漫個性、高貴舉止，咁樣佢先容易畀高分。參選佳麗都明喇，不過氣質係唔可以整容咁一時間整出嚟嘅。

對於內地甘肅舟曲發生泥石流災難，李雲迪就話一直都有留意災情發展，希望可以從唔同渠道去幫忙賑災，包括義務表演。今年亞洲小姐競選其他評判仲包括國際建築師Philip Cox、珠寶首飾設計師羅啟妍、日本歌舞伎大師坂東玉三郎同本港企業家朱李月華。