自由黨前主席田北俊同太太Mary出名係政壇模範夫妻，單係田太會為家人入超市親自揀食材，已經令唔少男士對田少投以艷羨目光。曾被拍到抱病為田少去超市買愛心朱古力鬆餅嘅田太，前日中午十二點幾一個人現身太古廣場地庫Great超市，買咗一大堆生果同餸菜，好似榴槤、豆腐、春雞同葱咁，只見佢去到付款櫃位左摷右摷，相當心急，原來搵緊環保袋。一大車餸菜，田太以四位數字結帳，卓妮問佢買咁多餸係咪用嚟請客，田太就話唔係，只係得閒落街買吓嘢啫，嘴角露出甜蜜嘅微笑，田少前晚應該好有口福嘞。
（楊歡成攝）
