政情：大輝福建土樓嘗粗糧
廠商會立法會議員林大輝上月底同家人去咗福建同廈門一趟，玩足四日三夜，盡興之餘，仲品嘗到福建土樓著名嘅農家菜添。內地地大物博，點解佢選擇呢兩個地點呢？大輝解釋，廠商會裏面，會長黃友嘉同副會長施榮懷兩個老友都係福建人，都不時向佢推介呢個好地方，終於決定成行。
大輝話，廈門係好適合旅行同投資嘅地方，因為當地綠化做得好、當地人又友善，加上生活優游同交通配套便利，所以整體感覺十分唔錯。佢又話，市裏鼓浪嶼小島地靈人傑，加上以往好多國家喺呢度起領事館，呢啲領事館現時已改做精品酒店，感覺好有外國風情。
講番今次旅程嘅重頭戲，大輝由廈門搭兩粒鐘車去到睇世界文化遺產之一嘅南靖土樓群，仲喺其中一幢土樓品嘗農家菜，雖然只係食粗糧、白粥，用嘅器皿亦都好樸素，不過啲食材就極為鮮甜，令人有返璞歸真嘅感覺添。講到咁好，相信好多人都心郁郁想去玩番轉！