政情：楊立門食晏快閃玩健身
香港嘅打工仔日做夜做，連休息嘅時間都冇，更唔好講話去做運動，而對工作量長期高企嘅高官嚟講，要每星期保持足夠嘅運動量簡直係難上加難。不過有「AO歌王」之稱嘅民政事務局常任秘書長楊立門竟然可以例外，原來佢選擇用午飯時間偷偷去做健身，保持靚身形！
尋日係康樂及文化事務署搞嘅「全民運動日」，唔少高官以及劉璇同李小鵬等國家級運動員都出嚟呼籲市民要至少一星期做三日運動，告別「豬腩肉」。楊立門就話要做運動冇難度，事關有時佢會趁午飯時間去健身室跑吓步同舉鐵餅，「通常都做半個鐘至九個字，做完運動食少少嘢補充體力就返去做嘢㗎喇。」楊立門果然識爭分奪秒！
康文署署長馮程淑儀被問及有冇做運動嘅習慣時，即刻向我哋展露手臂話：「睇吓我幾黑！一睇就知我有啦！」佢話佢平時鍾意游水，不過就話喺返工嘅日子，一星期要做足三日確係有啲勉強。