政情：醫局多奇難雜症肥胡束手

肥胡最近頻頻見報，事關係醫管局行政總裁蘇利民辭職，加深醫管局管理層「貧血症」。醫管局管轄全港一百六十間公立醫院同門診，體制龐大，運作咗廿年，早就機能退化，百病叢生，肥胡喺醫管局內遇到一啲奇難雜症，就更加係唔講唔知。

好似肥胡早前接受本報訪問時，講起「院霸」（長期住院唔走嘅病人）問題，憶述有一次去九龍醫院巡房，見到一位婆婆孤伶伶，肥胡見大家分屬潮州「家己冷」，於是上前寒暄，安慰婆婆好快可以出得院，氹得婆婆好開心。點知，翌日婆婆嘅兒子好不滿，怒氣沖沖質問院方，點解肥胡叫佢阿媽出院，令肥胡可能成為首個被病人家屬投訴嘅醫管局主席。

肥胡同我哋提起「舊痛」，一臉無奈加一頭霧水。肥胡曾經講過，執掌醫管局六年，最難忘係○七年有男子潛入仁濟醫院偷血飲嘅新聞，不過，喺佢心目中，論匪夷所思程度，肯定都及唔上呢宗「投訴」個案嘞。

與員工溝通受阻滯

仲有，肥胡一直想同醫管局員工建立電子溝通平台，喺午飯時間一點到兩點，以內聯網透過文字作同步交流工作情況，員工唔使露面，唔使開名，暢所欲言。不過，肥胡嘅大計又遇到難題，事關醫管局五萬六千個員工，唔係人人嘅工作環境都有部電腦，清潔阿嬸更加唔識用電腦，技術上有難度，肥胡惟有繼續研究。

連醫管局主席嘅任期問題都係肥胡嘅困惱。早前，政府不理「六六原則」，即公職人員原則上唔應該同一時間坐多過六個位，同一個位唔做多過六年嘅規定，委任肥胡做多兩年醫管局主席，惹嚟非議。肥胡有另一套觀點。肥胡話，醫管局體制龐雜，外人入到嚟，頭兩年都處於摸索階段，再做四年逐漸上手，又話要走，對醫管局唔好，所以佢建議政府特別放寬委任醫管局主席同成員嘅任期上限至八年。

醫管局主席，職責就係為醫管局管治診症下藥，肥胡喺崗位上遇到咁多疑難怪症，睇嚟佢需要醫生多啲喎。