中環耳目：施榮懷搶先戴廠商會新呔
有七十六年歷史嘅中華廠商聯合會，近年力求年輕化，連「會呔」都嚟個大變身。廠商會副會長施榮懷早前現身銅鑼灣食飯，率先展示新呔，粉紅底色配上廠商會Logo，感覺煥然一新。施生笑言，條呔只賣一百蚊，但質料媲美國際大品牌。
廠商會早年沿用紅、藍兩色「會呔」，設計平實，會長黃友嘉上任後，覺得變革吓fresh好多，於是請纓搵嚟常務會董方平幫手做新會呔，一齊精心挑選紅、黃、粉藍及粉紅做四種主色，再分別配上廠商會「孖圈」標記，簡潔又大方。
方平從事紡織業，生產領呔駕輕就熟，廠商會批新呔由佢負責製造，一口氣生產咗千二條，每隻色有三百條。為免女會員投訴被冷落，施生提議造多一百條黃、藍兩色新絲巾。新呔近月面世，方平自掏腰包向九十六位會董送上其中兩款呔，廠商會就送埋餘下兩款，即係話，會董們有齊「四色呔」，天天新款話咁易。其他會員想買呔的話，售價絕對大眾化，每條盛惠一百元，真係買布都唔得囉。