政情：末代會考生考起楊哲安
教育局副局長陳維安（Kenneth）同局長政治助理楊哲安（Jeremy）尋日齊現身，Jeremy上電台《政壇新秀訓練班》接受訪問，但唔知係咪準備不足，竟然畀一班年輕人考起。話說同場有幾位末代會考生，當中四位同學連續問咗六條問題，有位女同學批評Jeremy同一班教育局高官係香港教育界總廚，讚煮出嚟啲嘢好味，但隨手就將仔女送去隔鄰餐廳（外國），咁做係不負責任！
Jeremy最後無答呢條問題，唔知係一時唔記得，定係唔知點答呢？有同學又問到新高中課程中通識科校本評核嘅詳情，Jeremy承認冇呢方面資料，要問考試局至得。雖然尋日表現麻麻，但主持人都讚佢肯上呢個節目兩次，好過某啲官員搵極無影。
而Kenneth尋日就喺另一場合大談親子經驗，提到兩個仔今年九歲同十二歲，大仔不時用電郵問吓佢嘅工作情況。細仔亦好明白事理，有次放工返屋企好攰，細仔想佢陪睇二次大戰嘅黑白紀錄片，佢無逆個仔意，但最後都係瞓着咗。醒番後，見到個仔寫咗張紙，話知道佢好攰，不如下次先睇啦。Kenneth事後畀張紙老婆睇，老婆提醒佢要留起張紙，第時可以回味！