政情：余志穩掉轉槍頭轟政府
退休快將一年嘅前社會福利署署長余志穩「阿魚」，最近有新動向，就係加盟協助少數族裔人士嘅融樂會做執委。香港有咁多大大小小嘅社福團體，阿魚千揀萬揀揀中融樂會，原來係因為佢對平等機會同少數族裔問題有興趣。以往融樂會不時衝着政府而嚟，從阿魚嘅經驗同經歷嚟睇，莫非今次佢想掉轉槍頭同政府對着幹？
阿魚九月一日起正式加盟嘅融樂會喺○一年成立，以協助少數族裔起家，咁多年嚟都同政府不斷周旋。○四年為爭取大學開放學位畀少數族裔，佢哋試過「大」當時教統局嘅官員話，再唔開放就用人權法告政府。○六年政府為種族歧視立法，佢哋就大鬧條例保障少少、豁免多多。近年發生警察槍殺尼泊爾男子、銀行刁難去開戶口嘅少數族裔人士等個案，以至少數族裔學童就學等問題，佢哋都同政府據理力爭，甚至為少數族裔問題嘈到上聯合國。
做義工演講籌款
尋日阿魚出席一個活動時同我哋講，佢入融樂會做執委，實情只係做義工，職責之一係幫手做演講，好似警察學校或者教育學院邀請融樂會去演講，佢就代表個會去，講吓有關少數族裔嘅問題，甚至有需要的話，佢可以幫融樂會籌款添！不過以融樂會過往工作，阿魚都難免會掉轉槍頭對着政府，唔知佢將來會唔會同政府對着幹呢？對此，阿魚一笑置之，只係話相信政府做嘢會持平，對於佢自己如何自處，佢就無講到喇。
記得阿魚喺○二年至○六年做過民政事務局副秘書長，當時政府正準備緊為種族歧視立法，與不少少數族裔嘅香港人有接觸，只係當時佢係高官，嚟緊卻係代表融樂會，角色唔同咗，究竟阿魚如何自處，係咪如外界揣測般要掉轉槍頭對政府，大家不妨拭目以待。