中環出更：曾憲梓客家菜款待太空人
神舟六子旋風式訪港，除咗官式訪問，原來靜雞雞走入百姓屋企，食番餐地道家常飯。負責招呼太空人嘅，係有「領呔大王」之稱嘅前全國人大常委曾憲梓。曾老前晚喺九龍塘豪宅筵開七圍，宴請六位航天員及其家眷品嘗客家菜，曾家明星新抱黎瑞恩親自柯打巨型龍躉，誠意十足！
小恩子訂龍躉鮑魚
曾老五年來捐出二千五百萬元人民幣支持中國航天事業，太空人難得訪港，上門拜訪以示謝意。曾老對家鄉客家菜最自豪，前日專程從客家梅州速遞幾味特色客家菜宴客，包括「鹽焗雞」、「客家釀豆腐」、「梅菜扣肉」及「酵粄」，仲有用魚蛋、豬肉丸及牛丸炮製成嘅「三色丸」，太空人試過都食到舔舔脷。
有貴客到，曾家總動員出動款客，大仔智謀、次子智雄及細仔智明齊齊喺度招呼貴賓，智明嘅責任更是重中之重，太太黎瑞恩就負責打點菜式。小恩子對老友車婉婉開設嘅「車氏粵菜軒」好欣賞，一早預訂一條三十二斤巨型龍躉及十頭鮑魚，又準備好各類甜品及水果宴客。咁幫得手，難怪老爺曾憲梓喺一眾賓客前點名讚佢功不可沒。
炮製龍躉考功夫，據「車氏」總廚布先生話，先將龍躉背翅、胸翅及尾翅分成多份，油炸後用鮑魚汁、薑葱、陳皮等炆至入味。
楊利偉父子如餅印
美食當前，席上名人包括「福建幫」頭領楊孫西、廣東社團總會主席王國強、「新金王」黃英豪及建滔化工集團執行董事張廣軍等一於唔客氣，大快朵頤，中總榮譽會長霍震寰都有現身，但有事走先。曾老興致勃勃，開席前攞起支咪，高歌一曲《沒有共產黨就沒有新中國》，賓客紛紛攞部相機出嚟同太空人影合照，幾位航天員亦放下拘束，同智明飲番杯茅台。剛榮升做老竇嘅智雄就大晒iPhone內嘅BB女玉照，費俊龍同聶海勝都戥佢高興。
呢餐飯，「太空人二代」及太太都有份，楊利偉兒子楊寧康與其餘五位太空人仔女都同媽咪坐埋一圍。今年十五歲嘅寧康，同爸爸成個餅印，佢嘅膽識不遜於爸爸，坦言香港充滿挑戰，有挑戰才有機會，佢都願意喺香港生活。一眾太空人及其家眷日前暢遊迪士尼，寧康試坐「飛越太空山」後，大叫刺激！
太空人費俊龍公子費迪原來已十八歲嘞，暑假過後，將離開北京到南京上大學，費迪首次遊迪士尼，睇見卡通人物空群出動參加水花巡遊表演，雀躍非常！
卓妮