政情：內地神秘專家 關注華叔病情
年初證實患上肺癌嘅民主黨元老司徒華，自政改後甚少公開露面，尋日難得同自己嘅主診醫生莫樹錦教授齊齊出席癌症基金會講座，同大家分享抗癌經驗同心得。莫教授仲喺講座中透露，華叔患病嘅消息備受各方重視，九名內地專家年初主動來港商討治療華叔嘅方法，究竟呢班專家係何許人呢？莫教授不欲多講，只係話：「九個人嚟香港，六個同我開會。我一早識佢哋㗎，冇必要提對方身份吖！」華叔同莫教授唔肯講內地專家嘅來歷，華叔話：「冇特別呀，都係嗰啲人啦！」
照常生活 一樣去遊行
不過講到調理身體，華叔就健談好多。佢話自己平日服用冬蟲草同雲芝調理身體，仲會將蘋果、薯仔同紅蘿蔔榨汁飲，加上好聽醫生話，精神唔錯。尋日所見，華叔無昔日般聲如洪鐘，出入雖然要人攙扶，但答問題頭腦清晰，仲好幽默咁為莫教授個名拆骨：「樹，即係種植；錦，即係財富。不過你姓莫，即係叫你唔好搵咁多錢呀！」
華叔話，自己嘅癌症指數十八度，但症指數唔能夠反映全部狀況。佢又好輕鬆咁話，唔會特別問病情好定唔好，日常生活方面變化不大，照樣去遊行，只係唔會行晒全程。大家提佢唔好勞氣，華叔笑住話：「生活唔可以好似一池死水，要有啲火花！」佢仲提到自己抗癌都冇戒甜，繼續保留生活樂趣，每朝飲奶茶仍然會加三匙糖，瞓前仲食幾粒朱古力，唔到你唔服！