政情：潘佩璆葉偉明各奔前程
今屆立法會踏入第二個暑假，屆期已過一半，工聯會兩名勞工界代表葉偉明同潘佩璆嘅政途命運，亦漸露端倪。據了解，年初落大埔插旗、開咗首個議員辦事處嘅葉偉明，轉戰直選走勢凌厲，幾乎鐵定出戰新界東，而潘醫生雖然有助工聯建立專業形象，但係佢公營醫院顧問醫生嘅工作太忙，其低調溫和嘅個性亦未必適合行走兇險嘅政治森林，轉戰港島嘅行情已愈來愈被看淡，睇嚟換屆時大家好大機會各自飛。
工聯會現時有四名立法會議員，即九龍東黃國健、新界西王國興，同埋循勞工界功能界別出選嘅葉偉明同潘佩璆。按工聯會規章，佢哋嘅立法會勞工界代表不設連任機制，葉偉明同潘佩璆一二年一定要另謀出路，所以工聯早已部署，派二人分別駐紮新東同港島，為直選熱身兼測試選情。兩年過去，二人轉戰直選嘅行情走向迥異。
葉偉明已做足準備
工聯消息指，葉偉明轉戰直選嘅雄心愈燒愈猛，新東地區班兄弟已做晒心理準備，一二年立法會選舉由葉偉明抬住工聯支旗出選新界東，唔會再為民建聯「抬轎」助選，而明年底嘅區議會選舉，就係葉偉明轉入直選路嘅切線位，工聯將安排佢為新東地區競逐連任嘅工聯會區議員助選，變相為一二年提早落區拉票。
有工聯地區人士笑言，葉偉明轉行直選之路，順風順水，年初公民黨同社民連策動五區補選，若然自由黨田北俊或者新論壇龐愛蘭能落場硬撼「長毛」梁國雄，必定強勢再起，對葉偉明一二年選情構成威脅，但最終「阿爺」卻下令杯葛補選，令田、龐二人失卻一次捲土重來嘅機會，加上政改方案出乎意料地獲通過，新界有機會加議席，令葉偉明轉戰直選勝算大增，真係連個天都幫埋佢。怪不得葉偉明放暑假都咁勤力，尋日星期日都出嚟講最低工資啦。
潘醫生無時間掘票
至於同樣考慮轉戰直選嘅潘佩璆，經過兩年「試刀」，行情不被看好。潘佩璆本身喺醫管局做精神科顧問醫生，職務繁重，加上議會工作非輕，實在難以再揼時間落區掘票。再者，潘醫生性格低調內斂，呢種性格特質，鑽研醫學一流，但係對於求曝光、講噱頭嘅香港政壇，就相對蝕底，好難突圍。去年暑假港大民意研究計劃公布議會新丁調查，潘醫生成為最低知名度嘅議員之一，就係警號，所以潘醫生出戰港島嘅可能性已經愈來愈細。