早前有職業司機團體邀請環境局局長邱騰華喺大暑日落區，親身體驗吓喺酷熱天氣下，停車熄匙喺車廂乾蒸嘅滋味，但邱局長喺落區日子同其他細節安排上扭扭擰擰，畀立法會議員批評佢冇誠意兼冷漠。
環境局尋日終於公布落區細節，下周一由中午一點鐘至下午五時十分，依次到中環港澳碼頭巴士總站、銅鑼灣駱克道近景隆街小巴站、紅磡港鐵站外的士站、旺角花園街及通菜街的士站，最後一站仲到藍田公共交通交匯處實地考察。不過邱騰華又話一早有約，首站港澳碼頭要由環保署代表頂住先，之後四站先親身上陣，仲講明會進入小巴同的士車廂，但乾蒸幾耐就唔知喇。
停車熄匙未拗完，環境局又惹火頭，就係引起全港保育人士關注嘅大浪西灣工程。單嘢曝光唔夠幾日，立法會秘書處已收到十幾封電郵投訴，矛頭直指邱騰華，其中一封就狠批佢只係識得叫小市民停車熄匙，對於涉及有錢人嘅大浪西灣事件就冇晒符。另一封更借港府政改起錨口號，促請邱騰華act now！即係立即做嘢咁解。真係一波未平，一波又起！