政情：李慧琼返科大做校董
尋日憲報公布委任民建聯立法會議員李慧琼（Starry）做科大校董，下月一日起生效，原來佢不但係科大舊生，仲係歷來首位由科大畢業嘅立法會議員。
對於可以重返母校做校董，Starry相當興奮，自言對母校好有感情，依家不時都會揸車重返校園緬懷吓。讀會計畢業嘅佢又記得，當年成立冇耐嘅科大為咗催谷學生，比其他老牌大學更着重考試，一年幾乎由頭考到尾，連兼修嘅歷史科一樣要考，諗番轉頭真係覺得幾辛苦。唔知佢做咗校董之後，會否為班師弟師妹着想，建議校方減少啲考試呢？
與Starry同期進身立法會嘅另一民建聯議員陳克勤，年前亦喺建制派力撐下當選中大校董，重返母校服務，但係因為英文唔好爆出「try our breast」笑話，以及係透過黨派交易而當選，遭部分中大學生猛烈批評。不過今次Starry係由科大校董會推薦嘅，唔涉及黨派利益，加上佢英文咁好，相信都唔會出問題。