政情：胡曉明出書撐李樂詩
香港專業及資深行政人員協會（專資會）會長胡曉明（Herman），尋日與太太及創會會長容永祺等，齊齊出席由十幾位該會成員合作出版嘅《極地搜影》新書簽名會。佢哋會將賣書收入捐畀另一專資會成員李樂詩創辦嘅「極地博物館基金」，為對抗全球暖化盡一分力。
Herman話，佢哋喺李樂詩嘅耳濡目染下，開始關注全球暖化問題，十幾位成員去年底就膽粗粗去挑戰極地，由香港飛抵阿根廷再搭三日船去南極，大家都暈船浪暈到天昏地暗，但係一抵達南極見到當時嘅景色，就立即成個醒晒。
Herman形容南極嘅積雪有好多層次，新落嘅雪係白色，十年以上就藍色，千年積雪就紫色，令佢哋大開眼界，但其實親眼目睹千年積雪，並非一件好事，事關新雪覆蓋唔到千年雪，正正代表地球暖化得好緊要！所以佢哋最後決定將此行影落嘅過萬張靚相編輯成書，並將賣書收益捐晒畀「極地博物館基金」。
Herman係前全國政協委員胡法光兒子，當年佢讀完大學後奉父命返港接手家族生意，後來先再補讀番ＭＢＡ碩士學位。本來佢想修讀埋博士學位，但由於專資會會務繁重，令佢冇時間讀書，惟有寄望二○一二年卸任後，再一圓呢個夢想。