政情：周澄遲大到無緣火併卿姐
一個政改方案，令兩個女人成為眾矢之的，一個係因為支持方案、並向建制派支持者揮手而被群起攻之嘅民主黨副主席劉慧卿，另一個係堅決反對方案參加「五區公投」、其後又自爆做過舞小姐嘅前學聯秘書長周澄。尋日兩女相遇，一齊去網上電台做節目，本來諗住實會擦出火花，點知一個鐘頭錄影節目，周澄以傷風為由足足遲咗成五十分鐘，令到諗住睇佢兩人火併嘅人大失所望。
之不過，節目依然有驚喜，主持人之一前立法會議員譚香文（Mandy）大爆○五年政改內幕，話當年煲呔曾喺臨表決前約咗六名有機會「轉軚」嘅泛民議員上禮賓府密會撬票，其中Mandy故意漏料畀卿姐，等卿姐可以打畀另一個疑似變節人選街工議員梁耀忠，力勸佢唔好去禮賓府，最終令煲呔曾撬票失敗。Mandy借呢段政改秘聞，狠批卿姐依家變晒質，一度令卿姐扯晒火。
阿忠承認當年卿姐係有打過畀佢，但強調事前根本冇人叫過佢夜訪禮賓府，亦冇諗過「轉軚」，所以佢最後無上到去，同卿姐無關。