政情：特首辦開facebook任人鬧

擺明向白宮抄橋

由譚志源（Raymond）揸弗嘅特首辦，將會成立一個官方facebook（fb）帳戶，就各項政府政策同社會熱門議題，加強同年輕網民溝通，擺明向美國白宮嘅fb抄橋。高鐵風波至今隔咗接近半年，特首辦先至醒覺搞fb，實在係後知後覺。不過遲做好過唔做，點都好過一班死都唔願開fb嘅司局長。

特首辦fb將由Raymond譚領軍，履新兩個月即被封為特首辦「新媒體主管」嘅特別助理陳岳鵬，則負責具體製作。陳岳鵬喺美國史丹福大學讀書時，係使用fb嘅第一代先鋒，由佢操刀適合不過。消息話，以後政府會借用呢個平台，拉近同年輕人嘅距離。Raymond譚呢個大想頭最終能否如願，暫時未知，但特首辦fb想搞新意思，就好明顯。

特首辦fb除咗有特首辦官員撰文分享生活點滴呢啲例牌菜外，仲會有Raymond譚同特首辦常秘麥靖宇一班核心嘅個人介紹，又有工作實況嘅掠影，希望搞到有外國片集《白宮群英》feel。《白宮群英》裏面班總統幕僚角色，個個都係精英中嘅精英，同現實世界嘅特首辦差距有幾大，公眾自有評價，特首辦fb小心一開幕留言板就被人洗板喎！

消息又話，只要網民唔係講粗口、無侵犯知識產權，任何意見都可喺特首辦fb暢所欲言；即使鬧人「廢廢哋」、「狗官」都唔會被刪去。如果運作成熟，日後唔排除推出網上回答網民問題嘅環節。

記得今年二月，政府為安撫反高鐵「八十後」，運輸及房屋局局長鄭汝樺又係話用fb收集民意，但fb戶口只係接受咗三粒鐘留言，又揀喺朝早十點、即網民嘅瞓覺時段進行，淪為政壇笑話，仲成為港府昧於新興媒體運作嘅經典事例，希望特首辦fb唔好重蹈鄭汝樺覆轍就好嘞。

其實，外地政府早就借互聯網加強同市民溝通，美國白宮係表表者，馬來西亞首相斯里納吉更加習慣用fb及Twitter同民眾溝通，年初佢就喺Twitter透露煲呔曾到訪同佢作非官式會面，無意中踢爆煲呔曾放假去馬國。特首辦開fb，已經慢人幾步，希望唔好搞到一鑊粥啦！