中環出更：郭炳聯睇《兒童樂園》學做人
「書中自有黃金屋」，自小就愛讀書嘅新鴻基地產副主席兼董事總經理郭炳聯，尋日同媽打李麗娟一齊出席第三年搞嘅「新地2010齊讀好書」計劃啟動儀式。向來愛用實際方法推動香港閱讀風氣嘅新地，今次提供專車同午餐，資助逾一千個來自香港唔同地區嘅基層小朋友，參加為期四日嘅書展活動，仲贊助每人二百蚊購書津貼。咁都唔止，郭炳聯尋日更喺百忙中抽空同一百五十位基層兒童分享從商心得，話要喺商界出人頭地除咗兩文三語同數學要好之外，學習溝通亦好重要。
外表斯文嘅郭炳聯原來係金庸迷，細個為咗追金庸嘅武俠小說，連覺都唔瞓，匿埋喺被窩度開支電筒嚟睇書。咁勤力，難怪一早刨晒全套金庸武俠小說。郭炳聯另一至愛係《兒童樂園》，當中嘅成語故事，教識佢好多道理，難怪佢父母都好鼓勵囝囝睇多啲。
時下小朋友，每日行程表都密麻麻，郭炳聯話細個無咁忙，會用讀書嚟消磨時間，到小學四、五年班開始就養成閱讀習慣，所以好鼓勵小朋友睇書解悶。甚至乎遇到逆境，都會多睇書，因為書本嘅道理對佢好有幫助。正面嘅郭炳聯仲分享一句喺書本學返嚟嘅金句，就是「Tough times never last；tough people do（困難的時間不會永遠，堅毅的人則可永存）」，勉勵小朋友唔好怕艱辛。
許曉暉「接龍」講故事
民政事務局副局長許曉暉尋日都去咗書展講古仔畀十幾個小朋友聽，技巧仲好純熟。事關佢屋企兩個分別兩歲同五歲嘅小朋友，朝朝早六點半就捉住佢講古仔，至少講半個鐘；有時佢仲會同大女玩「接龍」，即係佢講一段古仔，囡囡就駁落去，增加彼此互動。不過佢話暫時唔打算帶小朋友嚟書展買書，事關小朋友換書換得快好浪費，都係善用圖書館設施好啲，不愧係民政事務局副局。
卓妮