月初發生「熱死司機」事件後，立法會有關停車熄匙嘅審議工作即刻加插落區體驗乾蒸環節，相關草案審議委員揀定最接近大暑嘅呢個月廿六日，捉環境局局長邱騰華去的士、小巴站頭體驗乾蒸嘅生涯。立法會航運交通界代表劉健儀（Miriam）近日密密搵邱騰華商量，結果邱騰華扭扭擰擰，好似驚Miriam「蒸熟」佢咁。
呢次體驗職業司機苦況之旅係議員提出，邱騰華冇得say no，雙方揀咗廿六日下午一點去；邱騰華焗住去，於是要求多多唔肯輕易就範。好似Miriam問佢使唔使安排幾架車畀佢到時上車感受，佢話落到區先徵用車輛，畀人潤佢話：「拍戲咩﹖到時啲司機大佬要開工，邊個理你﹖」跟住佢寧願搵運輸署安排車輛，唔領Miriam嘅情。
講嚟講去，邱騰華到最後係咪會坐上熱狗車車廂內乾蒸，依家都仲未有結論。Miriam忍唔住窒佢：「莫非又想用『目視法』搞掂呀﹖」