政情：蔡菜子靠阿媽輕鬆遊世博
上海世博逼爆人，參觀每個展館最少排隊幾個鐘，烈日當空真係隨時中暑。港區全國人大代表蔡素玉喺世博開幕後無耐帶阿媽遊世博，佢話媽咪不良於行，坐輪椅無咁辛苦，仲可以使用免排隊嘅無障礙「綠色通道」，帶挈埋佢輕鬆遊世博。不過，之後就有好多人離譜到扮殘障坐輪椅避排隊，好彩蔡菜子一早去咗，否則好可能畀人誤會佢博大霧。睇嚟玩世博要玩得輕鬆，認真唔容易！
蔡菜子無做立法會議員將近兩年，多咗空閒時間，佢經常周遊列國，同媽咪遊世博前，已經去過土耳其旅行，坐郵船暢遊博斯普魯斯海峽（Bosphorous），歎番杯地道蘋果茶。
佢尋日又跟隨港區人大代表到江蘇考察，聲言要歎吓著名嘅無錫骨，廿七日考察完結後，再同朋友去多次世博，玩到下月一日再啟程去敦煌旅遊十五日，然後再到西藏，一直玩到月尾為止。