政情：全國青聯副主席爭崩頭

全國青聯隸屬共青團，一向係港人踏足內地政壇嘅跳板，近年更吃香。按傳統，全國青聯主席必然由共青團領導擔任，副主席中香港有兩個名額，多年嚟為嫡系香港青聯嘅囊中物，好似港區全國人大代表霍震寰、王敏剛，以至快將卸任嘅全國政協委員黃英豪同前全國人大常委曾憲梓兒子曾智雄咁，全部都係出身香港青聯。不過，香港政治瞬息萬變，近年青年問題成為焦點，青年團體也如雨後春筍不繼冒現，難怪聽聞今次人事交替競爭非常激烈。

未有公布 充滿懸念

按慣例，全國青聯每年八月喺北京召開大會，但接替黃英豪同曾智雄嘅最終名單仲未有聲氣，令事件充滿懸念。阿Rock係香港青聯現任主席，理論上，全國青聯副主席港區名額出現空缺，順理成章佢有份補上。

而福建幫頭領施子清嘅兒子施榮忻喺中聯辦牽線下，○七年以國情研習班成員為核心創辦菁英會。菁英會去年同博鰲論壇合作，舉辦首屆博鰲青年論壇，並請來國務委員劉延東做主禮嘉賓，搞得甚為有聲有色；今年底菁英會準備再下一城搞第二屆。施榮忻依家做埋被視為富豪二代匯聚嘅百仁基金主席，論實力，絕對有力問鼎全國青聯副主席。

富豪後代 全力爭位

據悉有富豪後代亦力爭全國青聯副主席呢個位。香港青聯內部傳出，有人願意分五期捐出一千萬元，支持發展香港青年嘅工作，出手咁豪，真係非一般年輕人可比。據悉，中央有關部門早前曾就全國青聯副主席兩個港區名額問題，向幾位香港青聯元老徵詢意見，元老們全部企硬撐番青聯人，但全國青聯至今仍未能拍板，爭持有幾激烈可想而知。

我哋問阿Rock，以往一早已知道全國青聯開會嘅通知，但依家仍未收到消息，太太陪兩個囝囝去英國讀暑期班，自己都唔敢行開，又唔敢離港同歐洲生意拍檔見面。

親中消息指，政改爭拗塵埃落定，中央未來將着手處理香港激進勢力抬頭嘅「八十後」問題，因此對全國青聯副主席嘅港區人選相當重視，希望物色有心有力之士，推動香港青年工作步上正軌，消弭「八十後」隱患。到底中央呢條大原則能否貫徹執行，從全國青聯接班人班底，就可管窺一二。