中環出更：大孖沙齊撐鍾普洋新作
每年一度嘅書展即將開鑼，久違了嘅DHL亞太區創辦人鍾普洋（Po）都湊熱鬧搶閘推出新著作《落力退休》，尋日喺灣仔天地圖書舉行新書發布會。雖然阿Po退咗休十幾年，但杯茶依然滾熱辣，獲城中重量級商界好友到場支持，包括德昌電機集團主席汪穗中、利豐集團主席馮國經、恒隆集團董事總經理陳南祿（Philip）、前財爺百仕通集團大中華區主席梁錦松等。
卓妮見撐阿Po嘅政界人士都唔少，好似行會成員梁智鴻及查史美倫、前廉政專員羅范椒芬、前貿易發展局總裁施祖祥、眾人媽打李麗娟、前警隊一哥李明逵等，仲有來自教育界嘅港大專業進修學院院長李焯芬，大部分同阿Po已相識多年。馮國經、阿松同羅太因有事姍姍來遲，但仍然同其他嘉賓一樣排隊畀錢買書，好似小粉絲咁等攞阿Po嘅親筆簽名，好難得！
現年六十七歲嘅阿Po就講笑話，好開心有個咁活躍嘅老婆（Helen）成日「搞」佢，令佢覺得自己仍然好後生。《落力退休》全書分八個章節，當中提及享受退休嘅六大心法，其一係「孤獨求靜」，進行靜修、靜坐及冥想。另一心法係「撈走電鰻」，生命猶如一個大魚缸，電鰻代表人嘅心結，有時會被電鰻電親，要撈走。
陳南祿新工想做到退休
上周四先至去恒隆返新工嘅Philip就話，雖然自己仲未退休，但從阿Po本新書中有所得着，仲話之前國泰第一份工做咗卅三年，現在做恒隆第二份工，希望一直做到退休。難得見到馮國經，卓妮問佢對獲頒大紫荊勳章有乜感受，佢話好開心，但仲未有時間慶祝，要等十月領取勳章後再研究去邊慶祝喎！
卓妮