中環出更：朱玲玲性感背心熱爆中環
「永遠最美麗港姐」朱玲玲學攝影已有十六年，將攝影融入生活，經常孭住部相機影吓花花草草，更愛與朋友交流影相心得，攝影已成為佢嘅「二號情人」。卓妮前日下午四點半發現朱玲玲行蹤，見佢穿着性感小背心及黑裙，挽住常用嘅LV Monogram Multicolore手袋，一身時尚打扮遊走中環鬧市，引來唔少注目禮。
搵拍友傾偈
當日朱玲玲企喺置地廣場畢打街門外的士站左望右望，似係等司機嚟接佢，可惜近放工時間，中環好塞車，見司機遲遲未到，於是漫無目的逛吓附近商舖櫥窗打發時間。無耐電話突然響起，朱玲玲就稍移玉步到附近酒店上車，毫無架子。卓妮一個箭步上前打招呼，朱玲玲報以甜笑，話嚟中環搵一位「拍友」，傾完偈後夠鐘返歸嘞！
卓妮記得朱玲玲早前都去過置地廣場搵拍友，今次又嚟搵拍友，究竟搵乜拍友呢？據講朱玲玲同置地三樓間「Yewn」珠寶店老闆Dickson都係攝影發燒友，曾經組團北上取景，又經常聚埋分享攝影心得。不過，當日全程只見朱玲玲一人，未見佢老公瑞安集團主席羅康瑞，問佢老公點解無相陪，朱玲玲笑得雙眼瞇成一線話：「佢好忙呀！」
問及三個囝囝近況，朱玲玲話佢哋各有各忙，只係偶爾聚埋一齊食餐飯。至於大仔啟剛幾時同郭晶晶拉埋天窗，朱玲玲好肯定咁話:「未有咁快！」
卓妮