政情：馮程淑儀苦差交下屬
七月啱啱到，立法會仲未休會，官場已充滿抖暑氣氛。康文署署長馮程淑儀（Betty）、政制及內地事務局局長林瑞麟（林D9）、民政事務局局長曾德成都急不及待放暑假，Betty由聽日起放一個月悠長假期，懶理滿枱嘅頭痕工作。至於啱啱打完政改戰嘅林D9就喺立法會表決後放咗近一個禮拜假。有份周圍嗌起錨嘅德成局長都攞兩個禮拜假歎世界，個個走得快好世界，副手就慘囉！
因為頂唔住新聞處工時太長嘅Betty調去康文署後，工時少啲，又唔使廿四小時候命，舊年八月調任前，仲放咗個悠長假期。
點知聽日起佢又放一個悠長假期，一直放到八月三日，幾乎抖足一個月，其職位則由康文署副署長（文化）鍾嶺海署任。
Betty放長假，康文署好多頭痕嘅手尾就揼低咗畀下手，好似康文署轄下公園水池啱啱發生阿婆溺斃意外，點樣善後同防範都好重要，更何況樹木辦月中會公布二千棵危險樹木所在，康文署公園嘅樹木肯定走唔甩，鍾嶺海呢鋪真係焗住頂硬上。