政情：阿瑟王叫沈祖堯拆彈

寄語重道德教育

雖然新任中大校長沈祖堯唔肯評論周澄事件，但曾任中大校長嘅前教統局局長李國章（阿瑟王）就敢言開腔，寄語學校一定要教好下一代道德教育，又叫中大新校長去搞番掂佢，即係叫沈祖堯做嘢囉！

阿瑟王尋日又恩恩愛愛同太太去香港會食午飯，問佢點睇周澄事件，佢就笑笑口話：「由新校長去搞番掂佢囉，我離開咗（中大）就唔會再關我事喇！」但佢臨尾都補多句話：「一定要教好下一代嘅道德教育！」即係話學校亦責無旁貸。

無見阿瑟王一排，依然笑容滿臉，原來上月廿七日係佢六十五歲生日，今個月下旬又係佢兩公婆結婚三十六周年紀念，佢哋遲啲會去英國倫敦參加姪兒婚禮，並順道慶祝。