政情：高永文男人50避一劫
患癌愈來愈普遍，幾年前生過腦下垂腫瘤嘅香港防癌會主席高永文醫生都差啲中招。三年前無意中檢查大腸，原來生咗兩粒扁平息肉，慶幸發現得早，執番身彩。
高醫生尋日出席香港婦聯搞嘅「婦女健康大行動」宣揚及早檢查子宮頸及大腸嘅重要性，佢以過來人身份自爆三年前大腸出問題，事前無徵兆。
高醫生成日呼籲五十歲以上人士，定期檢查大腸，點知三年前當自己踏入五十歲，竟然仲未得閒檢驗。有日一位腫瘤科醫生老友催促佢檢查吓，免得老貓燒鬚。點知唔驗由自可，一驗果然「領嘢」， 大腸生咗兩粒扁平息肉，醫生引刀一快，幫佢「拆彈」，事關腸內息肉好易「快高長大」，變成腸癌。
肥膩嘢可照食
執番身彩，高醫生提醒大家咪學佢咁大安旨意，要定期檢查身體。佢又分享飲食心得，話千祈咪揀飲擇食，仲話肥膩嘢照食可也，冇戒口；不過佢都提醒大家，咪以為健康食物就可以搏命食，均衡飲食至係上策。