政情:煲呔曾致謝信親疏有別

政府一直都有個慣例,當立法會通過一個法案後,負責嘅官員會向支持法案嘅議員發信致謝。今次政改順利通過,煲呔曾都有親自寫信,不過我哋發現個個政團收嘅信內容都唔一樣,而且親疏有別!平時呢啲官式文件都冇乜人在意,不過煲呔曾今次實在大細超得令人側目,最長同最短嗰封信差近半,你話睇完唔嬲就假!

手握九票嘅建制派大黨民建聯封信當然最詳盡,煲呔曾大讚佢哋有「愛國愛港、勇於承擔、求同存異」嘅高尚情操,呢份讚美其他人都冇,擺明討好民建聯。政改一大功臣白鴿黨嘅信亦都唔短,又話佢哋有承擔、「為民主真誠奉獻」,一頂高帽戴落白鴿頭上。畀其他建制派政團封信親密程度就差一大截,煲呔曾只係稱呼佢哋做「親密戰友」。個別撐咗政府好耐又冇詐政府型嘅建制派議員仲慘,封信少咗好幾行,畀人邊緣化咁,認真冇癮。

煲呔曾早前請建制派食飯,已經畀我哋踢爆請啲唔請啲,仲要喺唔同地方,擺明大細超;依家連致謝信都搞親疏有別,要同議員維持良好關係?難囉!