政情：優才諮委會又見名人後代

委員會主席換上行政會議成員楊敏德，取代早前辭職嘅前中信泰富董事總經理范鴻齡。其他成員有唔少新面孔，包括新創建主席鄭家純兒子鄭志明，分屬「80後」青年嘅鄭志明，係新創建執行董事，年紀輕輕已接掌家族業務，當中包括污水處理等項目。另外幾位名門之後係做玩具業出身嘅丁午壽公子丁天立、富豪集團太子女羅寶文，仲有中華出入口商會會長李宗德千金李美辰添。