政情：范太點評特首之爭

特首選戰如箭在弦，行政會議入邊，至少三人覬覦，身為行會召集人嘅CY為出位攞分，成日就貧窮同房屋問題公然同政府唱對台、鬧高官係「火星人」，形勢七國咁亂。范太尋日同傳媒茶敍，都不禁慨嘆，全世界政府都有接班嘅問題，點解我哋會咁亂？

范太以講述德川幕府權力鬥爭嘅電視日劇《篤姬》劇情為例，指當權者要有胸襟，「人哋至會服你」；至於「想上位嘅人，亦要尊重政府，要互相尊重」，顯然點醒緊煲呔曾同CY。

市民眼睛係雪亮嘅

范太○四年曾經指民調支持度唔高嘅CY唔適合做特首，時至今日，范太都係咁睇，尋日仲反問記者：「我有冇講過佢（CY）適合做特首吖？」范太強調，做特首一定要得中央同市民信任，佢不點名告誡成日批評港府政策嘅CY，政治道德好緊要，唔可以市民鍾意聽乜就講乜，因為市民嘅眼睛係雪亮嘅。佢仲話，「如果你唔係真心，市民會懷疑你嘅動機，咁就得不償失」喎。

咁CY使唔使辭去行會召集人職務？范太話，咁又未使住，距離特首選舉仲有一年零九個月，但佢身為選委會委員，會咁做：「我會一路睇你點做，又睇吓你嘅對手點做，然後揀一個信得過嘅。」

范太口中CY嘅對手，唔知係咪唐唐呢？范太話，唐唐身為政府「冧巴吐」，着數在熟悉政府運作，○五年煲呔曾可以主政，除咗當時民望高，就係了解政府運作，而唐唐蝕底之處，自然係政府孭鑊，唐唐要孭埋一份。范太評唐唐算係留力，咁啱范太嘅姊妹「詩姐」梁愛詩前日現身唐唐家臣林大輝成立嘅「C18」開幕禮，唔知當中有冇玄機？

講開詩姐，政改一役中央突然接納民主黨「一人兩票」方案，范太話事前無收到風聲，至於佢當日預告煲呔曾稍後有消息公布，純屬係錯有錯着，係佢搞錯煲呔曾當日有活動。佢又謙稱佢喺事件嘅角色，同詩姐無得比，指詩姐係獲授權嘅中間人，而佢只係做走走趯趯嘅信差：「信差同中間人差一大截！」