中環出更：葉澍堃籌款好友齊捐名酒
國際小母牛香港分會近年積極籌款協助內地農民飼養牛羊脫貧，前財爺梁錦松同太太「跳水王后」伏明霞瞓身支持外，仲搵到百足咁多爪嘅前高官葉澍堃（Stephen）幫手籌款。Stephen無交行貨，早前搞咗場拍賣籌款晚會，獲各方好友鼎力支持，六席買枱加上拍賣共籌得三百萬元，Stephen呢個強力吸水機認真厲害！
小母牛拍賣籌款晚會喺銅鑼灣富聲魚翅酒家筵開六席，每圍枱賣十萬元，出席嘅善長有「快勞夾大王」杜振源（Simon）、前仁濟醫院主席吳守基、時裝設計師鄧達智嘅阿叔鄧慶治、冠軍科技集團主席簡文樂（Paul）、米蘭站主席姚君達（Byron）、「乒壇一姐」張怡寧、立法會議員石禮謙等，大部分人都有捐出拍賣品，Stephen更請來靚仔藝人黃宗澤（Bosco）同「阿叻」陳百祥到場幫手拍賣助興。
多件拍賣品中，以割愛捐出嘅「綠松石右旋法螺」法器最值錢，籌得一百萬元，不過阿Paul當晚有事無現身。早前喺半島酒店法國餐廳Gaddi's慶祝愛駒贏頭馬嘅Simon，亦豪捐五支法國五大酒莊嘅1982年靚紅酒做善事，包括Lafite、Latour、Mouton Rothschild、Margaux、Haut Brion，共籌得近四十二萬元。Simon捐靚酒之餘，自己仲競投埋一份，目標係「布根地酒神」Henri Jayer嘅1959年Richebourg紅酒。
杜振源38萬投「神之水滴」
1959年Richebourg被日本漫畫形容為「神之水滴」，識品嘗紅酒嘅人，唔會未聽過，喺市場上已好難搵到。今次呢支酒由鄧慶治同朋友饒永鑫捐出，Stephen毫不猶豫開出底價十五萬元，之後競投激烈，最後由Simon杜以三十八萬元投得心頭好。
當晚「乒壇一姐」張怡寧都捐出四塊親筆簽名嘅乒乓球板，籌到十六萬元。Byron捐出一個Hermes Birkin手袋，籌得十八萬八千元。
值得一提嘅係，吳守基買枱同競投紅酒外，仲帶埋去年喺小母牛競步善行籌款中以十萬元投得嘅Armand De Brignac Brut限量版金香檳到場，同大家分甘同味，大家盡興而返。
卓妮