政情：王英偉上網免費睇世盃

世界盃掀起全球足球熱，可惜賽事喺香港有播放權限制，唔係家家戶戶睇到。近日唔少人千方百計登入不同網站收看轉播，連浸會大學校董會主席王英偉（Wilfred）都知道有此「窿路」，佢話屋企冇裝「有線」，多得阿仔搵到網站，等佢有免費波睇！
王英偉（中）代表薛鳳旋（右一）將新書送畀恩人劉皇發（右二）同陳瑞球（左二），左一為梁智鴻。
王英偉（中）代表薛鳳旋（右一）將新書送畀恩人劉皇發（右二）同陳瑞球（左二），左一為梁智鴻。

浸大當代中國研究所所長薛鳳旋尋日舉行「香港發展地圖集第二版」新書發布會。不論睇書定睇波，Wilfred都咁鍾意，佢沾沾自喜話，出差北京時扭開中央電視台免費睇世界盃，過夠足球癮，可惜返到屋企因為冇「有線」，冇得睇。

薛鳳旋（右一）出新書，曾經做過佢學生嘅邱騰華（中）都嚟撐場，左一為薛鳳旋太太。 （溫國佳攝）
  • 薛鳳旋（右一）出新書，曾經做過佢學生嘅邱騰華（中）都嚟撐場，左一為薛鳳旋太太。 （溫國佳攝）

發叔球伯係薛鳳旋恩人

呢個中港差異，令Wilfred有感而發。佢話球迷要畀錢先有波睇，當然好唔過癮，但互聯網世界發達，大家上網睇，阻都阻唔住。佢公子梓雋就發現有網站可即時睇賽事直播，兩仔爺睇到唔捨得瞓。

講番薛教授出書，行政會議成員劉皇發同長江製衣主席陳瑞球都嚟恭賀，原來兩位係大恩人。薛教授話，八十年代時冇錢做地理研究，多得發叔捐五十萬做研究基金，呢筆錢，當年喺新界夠買地舖；至於球伯就贊助今次新書出版，捐出逾百萬元。呢兩份暖意，令薛教授好感慨，批評政府只顧增加就業，對學者缺乏資助，今次唔係有心人出手，本書根本出唔成。