有「李漢奸」稱號嘅民主黨創黨主席李柱銘又公然賣黨！民主黨千辛萬苦終於求得區議會方案被中央接納，但係「李漢奸」唔畀民主黨有安樂嘅日子過，尋日表明準備喺今晚嘅民主黨黨員大會提出，押後議決民主黨對政改方案嘅投票取向，一句講晒，即係又對民主黨搞破壞。
李柱銘被人叫「李漢奸」，皆因佢成日手指拗出唔拗入，拖民主黨後腿，最新鮮熱辣嘅一次，係佢公然講如果佢係煲呔曾，都會揀余若薇單挑辯論而唔揀民主黨主席何俊仁。今次政改大戰，佢早前已經開行摩打狙擊民主黨嘅區會方案，據聞，黨內高層怕咗佢，曾作私下游說，但係，佢變本加厲，尋日揚言準備提出押後黨內議決民主黨九名立法會議員嘅投票取向，話黨員未有足夠時間考慮喎，唔通真係唔玩死民主黨唔安樂？
政治係妥協嘅藝術，司徒華腰骨夠晒硬，佢都話要先接納方案再爭取普選。華叔話李柱銘唔識政治，又一明確例證。