政情：鬍鬚曾賴死唔走等邀功

立法會後日就會表決政改方案，煲呔曾嘅「真兄弟」、財爺鬍鬚曾上星期已經喺其網誌為煲呔曾倒定米，話余若薇喺法庭上雄辯滔滔，喺兩個人嘅辯論中，唔少人都擔心煲呔曾難以爭勝，結果畀佢不幸而言中。佢尋日嘅網誌又大發神威，話自己延遲兩日出發去加拿大多倫多出席Ｇ２０高峰會，為的是支持政改。
鬍鬚曾話要留喺香港支持政改。 （胡耀威攝）
鬍鬚曾話要留喺香港支持政改。 （胡耀威攝）

但鬍鬚曾尋日喺網誌中透露，原本計劃後日起程去加拿大多倫多出席Ｇ２０高峰會，但因為後日就係決定政改方案重要時刻，所以佢會留低以示支持，於是就推遲兩日先出發。

其實當煲呔曾高呼起錨，鬍鬚曾落區企喺「大佬」後面，都唔見佢咁投入，仲畀街坊問到佢口啞啞，跟住去中學硬銷政改，連基本資料都噏錯，去到邊度推銷都遇到示威者，搞到得個亂字。依家政改方案可能有轉機獲通過，佢就話要留低喎，究竟佢留低有乜用？唯一理由可能又係賴死唔走等邀功，想幫自己貼金啫！