政情：林鄭不分場合撐政改
港府高官硬銷政改已經到咗令人摸不着頭腦嘅地步。尋日發展局局長林鄭月娥喺福州出席「二○一○年內地與香港建築業論壇」，對住台下一眾建築界嘅京官、地方官同埋來自中、港、台嘅業界人士，竟然脫稿叫人撐政改。就算政改方案內容面臨修改照樣叫人支持，都唔知要支持邊個版本嘅方案！
政府新聞處尋日下晝發咗兩篇娥姐喺會上發言嘅新聞稿，第一篇係開幕禮致詞全文，通篇冇提到政改，好正常咁感謝吓合辦機構國家住房和城鄉建設部，讚美吓東道主福州，跟住介紹香港推動綠色建築嘅措施，順便交代香港援建四川嘅重建進度，講詞四平八穩。
但廿分鐘後新聞處又發咗第二篇新聞稿，話娥姐喺致詞時呼籲參與論壇嘅二百八十名香港建築界專業人士支持政改方案，話呢套方案係香港民主發展嘅重要步伐，不能再原地踏步。唔知係咪高官日日叫起錨口號，搞到個人機械化咗，幾時都要講兩句，算係交差呢？