政情：陳祖澤Ｑ版漫畫細數人生
馬會主席陳祖澤（John）即將卸任，我哋尋日喺快活谷嘅主席廂房，見到牆上掛住幾幅有佢Q版嘜頭嘅漫畫。其中有一幅細數佢嘅人生閱歷，由母校華仁書院嘅校徽，到九巴巴士都一一入畫，筆觸清新有趣，唔怪得John咁鍾意啦。
九巴成重要標誌
John話，幅畫係個畫家朋友送畀佢，賀佢○六年出任馬會主席。呢位朋友實係John嘅知己啦，事關畫作上盡顯同John有關嘅嘢，包括北京奧運標誌，因為佢有份喺香港傳遞火炬；又有佢揸咪唱大戲，連佢愛駒之一「勤有功」都寫咗喺左上角。最顯眼嘅要數John踩喺腳下嘅雙層巴士。佢離開政府後第一份工就係九巴董事長，所以喺另一幅同馬會幾位前董事一齊嘅漫畫中，巴士始終跟住John齊齊入畫，睇嚟九巴已成為John人生中好重要嘅標誌。
不過，點解畫中唔見政府呢？始終佢做咗廿七年公務員，喺香港回歸前做過唔少敏感而重要嘅工作。John笑而不答，陳太幫老公擋駕，話政府都離開咗好耐啦！