政情：建制派「炮手」扯火

政改大戰，炮火隆隆，中央要贏戰爭，唔計較戰役，對民主黨區會方案作出讓步，如無意外，政改方案將獲通過。有份參與談判嘅民主黨張文光，尋日證實，區會方案一度遭中央否決，因得到唔少親中人士盡最後努力「營救」，才得以重見天日，佢仲點名提到基本法委員會副主任梁愛詩同全國人大常委范徐麗泰，指二人為促成其事，奔走京港兩地。

梁愛詩同范太亦曾對區會方案提出疑問，但由於二人角色重要而特殊，為香港大局穿針引線，身形輕巧，終於玉成其事，但建制派有唔少人都有怨言。眾所周知，中央接納民主黨，首當其衝就係民建聯，除咗被民主黨攞彩之外，區議會政治化，以及五席立法會區議會功能組別議席一人一票選出嘅後遺症，可能就係衝擊民建聯喺下年區議會選舉同後年立法會選舉嘅勝算。

甘做過河卒 現被摑一巴

不過，原來除民建聯，建制派中人一樣有唔少重量級人物心中有火，事關中央否定區會方案時，佢哋甘做過河卒，幫手出力狠批方案如何違反《基本法》立法原意同人大常委會嘅○七《決定》，但現時形勢突然逆轉，區會方案將獲官方認可，符合《基本法》同人大《決定》，等如被人摑咗一巴，所以心中有氣，只係礙於大局，無公開發火，但係有口難言，玩自閉亦在所難免。

政改形勢突轉，特區政府亦顧此失彼，煲呔曾過去兩日約晤立法會議員，就區會方案向各黨摸底，唔知佢真癡呆定假大意，約漏一向對佢口下不留情嘅「詹Sir二人組」，「金勞詹」詹培忠話唔介意，會對政改方案貢獻自己一票，但「徒弟」、旅遊界謝偉俊就畀番面色煲呔曾睇，自嘲自己係二奶仔，連港府見議員自己都無份，對區會方案都係要分析吓先，然後至決定投票取向，擺明心中有火。睇嚟，政改表決結束之後，中央同港府都會忙於喺建制派內撲「火」囉。