中環耳目：余壽寧沉醉Absenta綠仙子
孖人牌代理商昌興交棒至第三代，由不安於室嘅行政總裁余壽寧（Homer）打理，昔日僅屬於昌興士多幾百種商品之一嘅洋酒生意，被佢發大成為有獨立門市嘅昌興醇酒坊。世界盃足球賽舉行期間，Homer首度將鎮店之寶、有「綠仙子」之稱嘅歐洲暢銷名酒Absenta嘅私家飲法公諸同好，仲好盞鬼咁取名「世界盃之迷」添！
位於尖沙咀加拿芬道嘅昌興醇酒坊，華洋名酒以至藥酒都有得賣。Homer講到Absenta就好起勁，事關綠仙子曾於十九世紀席捲歐洲，連藝術大師畢卡索都沉迷其中，有人更宣稱飲後見到綠仙子。其酒精濃度達百分之七十，雖無大麻成分卻會產生類似感覺，故曾被歐美列為禁酒，近年才解禁。
Homer最鍾意將佢溝成雞尾酒嚟飲，秘訣係加啲蜜瓜酒同Tequila，再加適量七喜、Tabasco辣椒汁，飲落更刺激。佢笑謂呢隻「世界盃之迷」最啱賽事正酣時與三五知己暢飲，幾杯落肚講吓波經，快樂似神仙！