中環出更：夏佳理：係律師都識做戲
為拍住政府高唱起錨騷，一眾行政會議成員早前被拖落水，夏佳理（Ron）都要上陣拍宣傳片大叫「起錨」，片中嘅佢表現七情上面，語調高低有致，同實力派演員有得揮。秘訣係乜？
呢個謎都係由阿Ron解開最啱，卓妮尋日趁佢現身跑馬地馬場擔任「港交所挑戰盃」頒獎嘉賓，捉住佢講吓拍片心得，阿Ron笑騎騎話：「係律師都一定識做戲㗎喇！」語畢就以哈哈哈三聲作結。呢句話認真可圈可點，令人聯想到大狀余若薇喺「余曾辯」中聲淚俱下發言，成功搶咗唔少分。到底阿Ron係講緊自己定係有所指呢？真係要問過佢先知道嘞。
宣傳片搵嚟胡紅玉、梁智鴻、張炳良等人粉墨登場，但係就唔見行會成員劉皇發亮相。發叔尋日現身馬場，為唔拍片解畫：「我哋（行會）有分工合作嘅，我做第二樣嘢，去第二度起錨！」唔做幕前，或者去做幕後啩。