中環出更：孫大倫三代同堂慶父親節
尋日父親節，有乜好得過兒孫滿堂齊慶賀？富士攝影器材有限公司主席孫大倫（Dennis）尋日成為「甜心爸爸」，大仔孫道弘請客，與孫爸爸、孫媽媽去灣仔「富豪飯堂」福臨門飲茶，BB孫女都嚟埋，三代同堂歎茶。行政會議成員夏佳理（Ron）就收到囝囝送嘅3G版蘋果iPad，果然係「潮爸」!
福臨門尋日逼爆人潮，好彩Dennis一早訂位，中午十二點幾抵埗就有位坐。Dennis心情靚爆，梗係喇，家人平時各有各忙，想坐低飲餐茶都唔係咁易。除咗Dennis同太太外，大仔、新抱、細仔道熙、細仔女友及BB孫女都嚟齊，啱啱好坐滿一圍。飲茶期間，兒子送上一張寫滿祝福字句嘅心意卡，Dennis既驚且喜。
孫家歡聚到晏晝二點幾離開，呢餐由大仔請客。離開福臨門時，Dennis仍然揸住張心意卡唔捨得放，講到父親節願望，佢話最緊要平平安安，快快樂樂！Dennis仲介紹兩位公子畀卓妮識，讀酒店管理出身嘅大仔幫手打理家族生意，細仔就係會計師，兩個仔都咁叻，飲得杯落嘞。
周松崗笑言父親節無着數
卓妮轉頭入快活谷馬場趁熱鬧，撞見行政會議成員劉皇發、夏佳理，仲有港鐵行政總裁周松崗添。發叔自爆前日提早同子女慶祝，喺馬會開餐。咁啱得咁蹺，阿Ron都喺前日慶祝，皆因太太夜晚趕搭飛機返鄉下奧地利度假，卓妮問佢邊解唔返鄉下，阿Ron笑得鬼馬:「我已經喺鄉下喇！」因為香港係佢屋企吖嘛。
同場仲有周松崗，佢話散場後同囝囝共進飯餐，佢笑言父親節對爸爸冇乜着數，因為食完飯多數由爸爸找數，好彩佢公子已三十歲出頭，請爸爸擦餐勁嘅，就絕對冇問題嘞。
卓妮